Wieder einisch meh us Oz!

Wunderschöns Wätter hämmer gha am Wucehänd. Ich bin glaub sogar chli brun worde;-) Mir hend am Samschtig Big Exo Day gha. Das isch so en Event für Jugentlichi. Es isch inre riesig grosse Areal gsi mit verschiedene Pärk. Es het Skatershows, Motocrossshows,Kytesurfshows und no vieli anderi Shows gha. Zudem hets no chlini Konzert gha, vo Hip Hop bis zu Hard Rock. Den verschiedeni Ständ vo Organisatione. Zum Biespiel über Hunger, Armuet, Mänschehandel, Wassermangel etc.. Ich han am Morge ghulfe bi all dene Ständ und nocher am Nomittag eifach glueget das d’Jugendlichi alli Regle schön ihaltet bidene Pärk.
Am Abig hets den im grosse Stadium einigi Band’s gha wo gschpielt hend und nocher het no d’Band vo eusere Church (Hillsong United) gschpielt. Es isch eifach massiv gsi, fascht sganze Stadium isch voll gsi und all die Jugentliche, eifch genial. Den hets no e churzi predigt gha, und eusi Band het den wieder gschpielt. Es isch en fenomenale Abig gsi eifach under freiem Himmel hämmer gworshiped.
Am schluss hämmer den en hufe gha zum ufrume, aber das isch okey gsi, es isch s’wert gsi für de Tag. Und ich glaub vieli Jugentlichi hend freud gha, das so öpis organisiert wird jedes Jahr. Ich glaub es isch jedesmal immer sehr erfogrich! Ja wer weiss, vielicht bini nächscht Jahr au wieder debi! ;-)
Suscht gahts mer guet, ich bin chli chrank gsi die letscht Wuche. Am Sunntig und geschter hani meh oder weniger nur gschlafe und das wortwörtlich. Ich weiss au ned was los gsi isch, ich bin eifach total müed gsi und han de ganz lieb Tag im Bettli verbracht. =)
Momentan bini viel am studiere, es git so viel wo ich erläb, wo ich ghör, wo ich mach, mänglisch isches no schwierig zum alles verarbeite. Aber au nach wie vor bin ich überzügt das ich am richtige Ort bin und ich bin parat für alles was no uf mich zuechunt. Jede Tag isch anderscht und jede Tag bringt so viel verschiednigs. Mängisch freui mi eifach nur no uf mis Bettli und mängisch chani de nächscht Tag chum erwarte. Aber am beschte chani mini Gedanke sortiere, weni in Park gahn go jogge mit Musig ide Ohre und eifach ränne oder schnäll laufe je nach dem! ;-) weni ellei bin die rueh und eifach weiss, ich chan vor Gott cho so wieni gad bin. Chan mini sorge und gedanke und alles was gad suscht so i mich umeschwirrt ablege und druf vertroue das er alles im griff hät. Und das het er au. Keis Gebät isch bis etz unerhört blibe. Es staht im Psalm 91,15 und wer zu mir rüeft, dem wird ich antwort geh. Und das isch wücki so und ich glaub das ich etz da in Australie bin, isch de beschti bewies defür das Gott mini Gebät erhört und mir de Wäg zeigt. Wie oft hani de Traum eifach ufzite gleit will ich gwüsst han es isch eifach ned dra. Will ich gwüsst ha netz isch das wichtiger und das… Nie het ich dänkt das Gott uf min Traum so rücksicht nimmt und das möglich macht das ich da hi chan cho, die wahrschindli bescht Bibelschuel chan bsueche und eifach so viel derf lerne und erfahre. So viel sache wo unmöglich sind, sind für Gott eifach en klaks und ich weiss das alles mir zum beschte dient, wen ich Gott vertrou. Ich bin so gsägnet mit so vielem guet, wo er mir is Läbe bracht het. Wie Familie wo mir ghulfe händ, das zermögliche, da zsi. Fründe woni weiss egal wo ich bin und wie wiit mer vonenad entfernt sind, sie blibed fürs Läbe. Ich bäte das jede wo de Blog liesst, das derf erfahre wo ich erfahre, eifach Freud, Glück, Friede au wens mal turbulänt wird. Debi musch du ned mal das mache wo ich mach, oder so sie wie ich, eifach nur Gott vertraue. Viellicht tönt das komisch oder verruckt, aber das chamer nur usegfinde wen mers mal usprobiert. Was au immer chunt, es isch immer eine da wo nur druf wartet zum hälfe.
Hebed e gueti Ziit,

bhüet eu Gott

Much love Cristina

Eifach Gedanke

Ich lig gad i mim Bettli eich viel zfrüeh zum müed si ;-). Mini zimmer mitbewohnerin d Brei, isch ide Stube spielt Klavier und verzaubert de Rum mit ihrer wunderschön Stimm. Sie übet für en solo Uftritt. Ich liebs wen sie spielt und singt, es beruigt mich und hilft mer mini Gedanke z Sortiere. Weredem luegi chli im Internet umenand.
iheart.org
waterforwater.com.au
compassion.ch
Hilfsorganisatione, wo versueched uf Nöt vode Mänsche ufmerksahm zmache. Wo öpis wend mache und Lüt motiviered zum hälfe.
Ich frög mich was isches was ich chan mache. Wo chan ich min bitrag leischte? Was chönd mini beide Händ tue. Meischtens, wen ich Bilder gsehn vo armuet, vorallem ide 3 Wält Länder, wünscht ich chent mich sofort det hi bime und gad vor Ort hälfe. Es wer es riese privileg ganz praktisch öpis zmache. Nur für ein Tag, emene Chind wo so guet wie nüt het, es lächle is Gsicht s'zaubere. Keis Gäld uf dere Wält chent mer so e freud bereite als so öpis z'gseh. uf de iheart.org site hets uf de rächte site en clip, es isch de zweiti. Wen du mal zit häsch luegs der doch a. Es het mer wieder einisch meh bewusst gmacht, was mer chend bewürke. Ja mir chend öpis tue, wen mer eusi Auge uf mached und idie Wält lueged. Jede einzelni wo öpis macht, bewürkt öpis. Vieli Mänsche hend scho en underschied chöne mache, und wämer de richtige Chef hät isch sowiso nüt unmöglich! ;-)

Hebed e gueti Wuche, bhüet eu Gott

Cristina

So mini liebe! lang isches wieder her, sit ich en blog gschriebe han. ich hoff es gaht euch guet. Mir gahts nachwie vor super da. Jede Tag isch anderscht, jede Tag ischen entscheid. Entweder er wird super oder er wird weniger super. Aber mer chan sich a jedem neue Tag entscheide, das de Tag guet wird, einzigartig und anderscht als de vortag. Es lieht ellei ide entscheidig. Jede Tag isch guet, will jede Tag vo Gott gschaffe isch. Ich bins gad wieder mal am lerne mich jede Tag gad weni ufwach, mich zentscheide, das de Tag guet wird. Ich han alle grund zum mich freue, unabhängig vo mine Gfühl. Ich möcht mich ned vo mine Gfühl oder Emotione beiflusse la, will die sich oftmal tüsche chend. Ich han alle grund zum dankbar si, will ich alles han wo ich bruch. Jede Tag isch guet, es chunt eifach druf a wie mer sich entschedet. Sit ich agfange han, bewusst jede Tag ufzstah und mich zentscheide das de Tag guet wird, will Gott de Tag gmacht het, isch jede Tag anderscht. Ich freu mich, er bringt so viel optione, möglichkeite, gspröch, erläbnis, erinnerige für spöteri ziite und viel meh... Wer weiss mem mer begägned, wen mer mi bewusst offne Auge dur d Wält laufed. Wer weiss was mer gsend, wen mer bewusst mal ahaltet und die wunder schön Schöpfig alueged. D Luft um eus ume iatmet und eifach für en Momänt schnufed und tüf Luft holed. Was würdemer alles nöd verpasse, wen mer jede Tag bewusst läbed. Ich möcht jede Tag anderscht erläbe, und debi chunts ned druf a was mer mached, was mer schaffed, was mer tünd, sondern wie mer eus entscheided. Jede Tag isch guet.

Drum wünsch ich euch ganz en schöne Tag, was au immer ihr mached, woner sind, wiener eu fühled, ich wünsch eu eifach en guete Tag!

Bis gli, bhüet eu Gott

Cristina

I love God!
I love Life!
I love People!

Nina und meh...

Sooo, hei chum hani de letsch Blog gschriebe, mussi scho de nächscht schriebe! ;-) Ich bin etz gad hei cho vo mim Fieldwork, es isch en super Abig gsi, ich bin etz d Assistäntin vom Nathan. Mir sind verantwortlich das alles technische funktioniert. Zums nimal churz erchläre, was ich i mim Fieldwork mache... mir hend diversi Workshops und Kürs womer abüted, wo amig am Mäntig Abig sind. De Nathan und ich lueged das alles funktionmiert mit Musig, DvD, eifach das elektronische! Es macht mega spass, will ich so nomal öpis meh lerne tuen. Mir hend so Mischpult und Soundalage, mit dusig chnöpf und es gseht komplizierter us als das es isch. Aber es isch toll au mal so öpis technisches zmache. Wahrschindli wirdi ide nächschte paar Wuchene no meh de zuelerne i all dem Technische bereich womer hend ide Church.

Die Wuche isch no d Nina cho!! Je ich han so freud gha. am Mittwuch Morge isch sie acho. Sie het mer no Gschänkli bracht vode Lg. Aromad!! S bescht woni het chöne becho, eifach Aromad!! Das gitz da nämli ned und ich liebe Aromad, danke viel mal ade LG4 ide Jugi Züri, ihr sind die beschte!
Es isch schön das sie da isch, es fühlt sich chli a wie diheime. Es stückli Schwitz! Mir hend chli öpis undernoh aber leider ned so viel. Ich han ihre s Operehuus zeigt und chli ide Stadt simer umeglofe. Einisch simer no an Strand natürli an Maroubra Beach, de schönschti wos da git. Ich glaub es het ihre rächt gfalle. Aber gli verlaht sie mich scho wieder! =( so schnäll gahts ume. Aber danke Nina das du cho bisch und für alles was du da gmacht häsch idere Ziit wo du da bisch gsi. Ich schätzes sehr! Ich freu mi scho wämer eus ghöred im Skype! Hehe mir hend ja ned so en grosse Ziit underschied.
Sîe isch de beschti Gascht womer bis etz gha hend!

Suscht hani eu ned so viel zum verzelle, z Wuche isch einisch meh eifach viel zschnäll ume gange. Schnäller als mer wott und etz isch den scho gli wieder Zischtig! Oja öpis hani no! =)
Am Samschtig im Streetteams isch es u toll gsi. Mir sind binre Frau dihei gsi, sie isch chli Älter aber ganz e liebi. Mir hend zerscht u lang mitere gschwätz und nocher hämmer sie gfrägt öbmer öpis chend hälfe. Sie het den gfunde, ja nächscht Wuceh.. Ich glaub es isch uf ihre uf die eint site chli Unagnehm gsi. Aber den het sie so schüch gseit, ja d Feischter.. Mir hend den eifach agfange und schlussäntli hämmer meh oder weniger s`ganze Schlafzimmer putzt gha. Sie isch mega froh gsi das mer das gmacht hend. Sie het den gseit das sie`s u schätze tuet und froh isch dasmer das mached. Es isch so luschtig wie dlüt uf eus reagiered wen mir chömed. Die einte meined den so, ja die mit de grüene lieblis sind wieder underwägs, und die einte sind eifach froh, will sie wüssed das mer da sind zum hälfe und zuelose. Ich liebs, es macht mer so spass eifach gah und mit de Lüt schwätze und öpis mache. Klar mängisch hämmer au chli unaghnemi reaktione, aber da derf mer sich eifach ned underkriege lah!

Ich möcht euch eifach no öpis mitgeh für die Wuche. Vielicht e chlini ermuetigung, für mich isches uf jedefall eini!

Der Herr ist mien Hirte, mir wird nichts mangeln.
Er weidet mich auf einer grünen Aue und führet mich zum frischen Wasser.
Er erquickt meine Seele. Er führt mich auf reicher Strasse und seines Namens willen.
Und ob ich schon wanderte im finsteren Tal, fürchte ich kein Uglück, denn du bist bei mir, dein Stecken und Stab trösten mich.
Du bereitest vor mir einen Tisch im Angesicht meiner Feinde.
Du salbst mien Haupt mit Öl und schenckst mir voll ein.
Gutes und Barmherzigkeit werden mir folgen mein Leben lang, und ich werde bleiben im Hause des Herrn immerdar.
Psalm 23

Das isch esn wunderschöne Psalm. Der Herr ist mein Hirte nichts wird mir mangeln. Wow ich weiss immer das mich de Herr begleitet, wo au immer ich gahn, segs jetzt da in Australie oder ide Schwitz. De Herr isch da, isch ob etz es finschters Tal vor mir lieht, e Ziit wo vielicht turbulänt isch oder ned eifach, ich muss nie ellei dur öpis gah. Wie au du, de Herr isch mit dir, wen du ihn lahsch, ihm vertrousch, ihm Ruhm gisch. Ich lieb de Psalm und ich hoff er isch en trosccht und en ermuetigung für dich.

Das wärs vo mir für die Wuche! Ich wünsch eu e super Ziit, hebed sorg und bis gli.

Bhüet eu Gott

Cristina

Wie schnäll Ziit vergaht

Äntli chumi wieder mal dezue zum en Blog schriebe. Ziit vergaht so schnäll, chum isch Mäntig, isch schowieder Sunntig.
Da chent mer ja fascht säge eis Jahr isch zchurz zum da si. Das säged aber au viek Studänte vom College. Eine us de Schwitz de Siemeon er isch us Bern, het mer verzellt, er het nach eim Jahr ned gwüsst ob er söll blibe oder wieder hei. Da isch er aber hei und isch etz de Juli wieder cho fürs zweite Jahr! =) Aber es chunt halt immer uf eim sälber druf a findi. Für die einte isches guet 1-3 Jahr s College zmache und für die einte isch au eis Jahr gnueg.
Uf jedefall isches wücki so das da Ziit so schnäll ume isch, ich gfind chum Ziit zum alles richtig ufneh was ich ghör ide Schuel. Momentan is gad eso, das je meh ich ghör desto weniger verstahni. ;-) Es isch eifach gad chli überfordernd, weni das so chan säge. Ich "lern" und ghör und erläb so viel und irgendwie fehlt fascht Ziit zum alles chöne verarbeite und sortiere. Am Fritig bini am halbi 5 den wücki am änd gsi mit zuelose aber au froh das es verbi isch gsi. Ich han fascht es schlächts Gwüsse becho, willi froh gsi bin dasi äntli han chöne gah. Aber ich han mit minre Cotutorin gred. Sie het glaub chli gmerkt dases chli zviel isch für mich. Aber sie het mich sehr ermuetig und gseit, das es völlig normal isch. Ich seg ned die erscht wo sich so überfordert fühlt, da ja Englisch au ned mini Muetterspracht isch und ich ja scho e ewigkeit nüm ide Schuel gsi bin und dahers au ned gwhönt bin zum lerne etc.. isch das normal. Ich muss mir glaub eifach sälber chli Ziit geh und chli geduldig sie mit mir. Das hend au die andere Schwitzer gseit, sie heged all ähnlichs dure gmacht! Puh dabini schono froh. Aber trotzallem isches u spannend, ich han sgfühl mis Läbe wird ganz neu gformt. Wie en Tonchlumpe wo zunre Vase wird. Mir werded immer wieder Momänt bewusst, woni mich eifach wieder neu entdecke tuen. Oder sache mach wo ich vorher nie gmacht het, ruihg blib i Situatione woni vielicht chli usgflippt wer. Aber au Sache wo halt ebe min Charakter formmt im guete Sinn.
Es Bispiel, Christian Doctrine. Uf hüt mussi die erscht Arbet schriebe. Es sind so Vier Frage woni beantworte mun.
S einte isch (das uf Dütsch übersetze...) 4 Pünkt nänne, wo mis Theologische Läbe oder Dänke oder Glaube, gformt hend. Das isch scho mega e kuuli frag, ich han mir doch nonie so wücki richtig Gedanke gmacht was min Glaube so gformt het ide letschte Jahre. Und das isch au öpis da entdeckt mer sich irgendwie ganz neu.
Zweiti Frag isch, es git 3 Fundamänt, wo spersöhnliche Theologische Glaube forme tuet. Das hämmer den alles ide Lektione gha, verzelle kein gugus! ;-)
Es isch so kuul, wiemer sich den wücki über eim sälber gedanke macht und überleit, warum glaub ich das oder warum isch das so... Ja wie scho gseit, mer lernt sich wie neu känne.
Christian Doctrin isch eigentli es vo mine Lieblingsfächer, aber au eis wo am schwierigschte isch zum alles verstah.
So viel mal zur Studiewuche.

Ja da hani ja au no Genurri gha!!! Ha, etz bini scho 21gi! unglaublich. Ich fühl mich fantastisch. Ich weiss no bevori 20 worde bin hani scho e chlimi Krise gha. Ou nei, mini 10er Jahre sind verbi und etz gahts den viel zschnäll und erwachse und sälbschtständig... Ihr känneds wo 20 gsi sind känneds und ich känn viel wo das churz hend wo 20 werded! ;-) aber ich fühl mich super, es isch so en schöne Geburri gsi. Ich han adem Tag 2 Päckli becho, und sie sind eifach gnau rächt zitig acho, de Pöschtler het mich gad ufgweckt gha adem Morge. Ich bin den us mim Zimmer und die ganz wohnig isch dekoriert gsi. =) Im College hend so viel a mich dänkt und mir wücki de Tag ganz speziell gmacht. Am Nomittag hemmer den e Lektion gha mit de 1 Jahr studänte i mim Strem und all hend den gsunge. Ich glaub, das sind über 50 Lüt gsi. Fantastisch, han ja den dröti im Gsicht gar ned gmerkt! =) Am abig sind, den zwei Koleginne cho und eini het en Schoggichueche bracht us de Schwitzerbekerie, so en spezielle Schoggichueche, ja wos halt dihei ide Schwitz git. Ich weiss aber nüm wiener heisst. Uf jedefall super guet gsi. Und die eint het en superfeine Chaitee gmacht. Ganuz speziell mit Honig und so Milch. Ja ich weiss es tönt ned so überwältigend, wen ich das so verzell, aber er isch super gsi und ich liebe Chaitee! Will mini Wg Koleginne adem Abig Teamnight gha hend, hani drum ned gross gfiiret, will sie ned hettet chöne debi si. So bini drum spöter no go schwümme.
Am Fritig hämmer ja immer Wg Znacht zäme. Ich han den dörfe wünsche und mich bechoche lah. De Manuel us Holland, wo ja fascht euses 5 Wg mitglied isch (eifch am Fritig bim Znacht) het es feins Curry gmacht. Aber staht Riis hets Riisnudle geh, super fein gsi. Ja den simmer id Stadt (Circular Key) das isch det wos Operehuus isch. Es het e super feini Gelateria (aber ned so guet wie de Leonardo usem Sihlcity, münder umbedingt gah und ihr werded es neus Glace erläbnis ha) gha womer entdeckt hend. De simmer chli go laufe und hend eifach die Herrlich Nacht gnosse. Am schluss simmer den natürli no in Starbucks!!
Womer den wieder dihei acho sind und all gange sind ussert d Rebecca (wo übrigens us Rüti sich!!) und d Monika beidi Schwitzerinne, hämmer eus no so schön im Mondliecht underhalte. Das sind 2 Schätz! Ja es isch en perfäkte Geburri gsi, ned nur willi da in Australie han dörfe si und will d Lüt da mir wücki s Gfühl geh händ es isch min Tag es gaht um mich. Sondern au will so viel vo dehei a mich dänkt hend. Ich han so viel Grüess uf Facebook gha, so viel e-mails, Telefon arüef, Chärtli, SmS etc becho. Ich han mich riessig gfreut über eu all wo amich dänkt hend und ich möcht mich ganz fescht defür bedanke! Ihr sind super! Vorallem mini Familie, ich lieb eu vo Herze und bin Gott jede Tag eifach dankbar eu dörfe zha!! Unvergässlich.

Samschtig/Streetteams! Yes! Ja letscht Wuche hani ja Trainig gha vo Streetteams. Etz bini ja voll informiert über alles. ;-) Es isch ganz guet gsi. Am Morge hani mi no so chli schlapp gfühlt und müed, bi ja au spaht is Bett. Aber nochem Imput, bini den wach und parat gsi. Ich bin ja immer Towersteam. Aso mir gönd zu dene Wohnblöck und fröged eifach d Lüt det öbs bi öpisem Hilf bruched etc... Mir hend eifach so e Lichte mit Tür Nummere und Näme, herkunft (oder eifach jenachdem was mer suscht no wüssed) Bi einre Nummere isch eifach Man (Mann) gstande. Er het den ufgmacht, es isch en Ältere Herr gsi. Zerscht het er eifach gseit ja danke bruche nüt... Mir hend den eifach gfrögt, ja wies Ihne gaht und so. Den het er afange rede und er isch s Herzigschte woni je gseh han. En 80 Jährige Herr us Pole, aber wie 80 gshet er überhaupt ned us, fascht kei Falte im gsicht und super herzig. Er het den verzellt wie er dahi cho isch und was er gmacht het und eifach ja verzellt was en Herr i sim Alter halt zverzelle het. Mir hend u viel vo ihm dörfe erfahre. Ich hanen gad is Herz gschlosse und ich freu mich so ufs nöchscht mal wemer wieder gönd! Etz staht nüm nur eifach Mann sondern sin Name und vo wo das er isch. Tür Nummere het en Wert becho, es isch ned nur eifach e Nummere sondern en Name en Mänsch. Das isch so schön zgseh wie eifach Türe ufgönd bidene Mänsche. Ich weiss vieli wo det wohned hends ned eifach, sind vielicht ellei und ebe alt oder einsam. Den für e churzi Ziit eifach öpertem chöne freud mache isch so guet. Er het sich so gfreut und ich glaub er freut sich au ufs nächscht mal wieder. Mir hend eich ned viel gmacht adem Tag, dLüt hend eus ned brucht zum öpis putze oder flicke oder so, aber mir hend adem Tag viel guet underhaltige gha. Es het sich so glohnt, so eifach chöne Mänsche begägne und Ihne es stuckwiit Liebi wiiter geh. Das isches, wens heisst lieb din nöchschte oder din Nachber. Es sind ned nur die Mänsche wo dich zrugg liebe chönt, sondern Mänsche wo nüt hend zum zrugg geh oder wo dich vielicht ned liebed. Für die wo die Gschicht känned, wo de einti, er isch glaub en Riche Herr gsi, es Fäscht geh het und sini Fründe und so Iglade het aber niemert isch cho. Aber den het er sini Diener uf Strass gschickt, zum, die Obdachlose und arme und verwittwete izlade. Ich lieb die Gschicht. Wills eifach Mänsche git wo sich freued um es Fäscht wos iglde werded wos nüt mpnd bringe oder zahle oder was au immer. Mir hend den gli mal es Babecue und ich weiss vo einigi usem Tower wo scho denah gfrögt hend und sich u druf freued. Für ein Tag Mänsche us ihrne Wohnige zhole und gmeinschaft und Fun mit anderne zha!

Geschter isch natürli en super schöne Sunntig gsi! Viel isch los gsi, aber am Abig nochem Welcom to church Party, simmer (mini wg Kolegin d Brei und de Rick) go jogge und es het so guet ta. Haha ja ich muss scho chli luege, da isch en gföhrliche ort! ^^ Und wemer ned luegt passierts schnäll da nimmt mer zue wie nüt! ;-) und de summer chunt ja gli, bis eus! Aber wie guet isches das mer gratis es Fitness und es "Schwümmbad" hend!

Ich wiess ich schrieb amig viel, das isch eifach willi viel zum verzelle han und wills mer wichtig isch das ihr drus chömed was ich da verzell. Ich hoff trotzdem das es eu spass macht min Blog zläse. Wener irgendwelchi Frage hend und meh möchted wüsse, fühled eu frei mir es Mail schriebe oder en Brief, wie i guete alte Ziite! ;-)

Ich wünsch en super Wuchestart, hebed sorge und bhüet eu Gott!

Cristina

So Good!!

So etz, hani die erscht richtig Studiewuche hinder mir. Es isch eifach Awsome!! Etz weissi au so richtig was lauft, wo ich wie, wen und wo si muss. Mini Fächer sind super. Ich han jedes Fach eich zwei mal. Eimal Lecture und eimal Tutorial. Lecture, bedüted, das mer eifach mit allne im erschte Jahr zäme sind und im Tutorial, tümmer i chlinere Gruppe oder Klasse das womer glernt hend ganuer aluege. Au drüber diskutiere und vertüfe. Mini Fächer sind:

Personal Evangelism/ Tutorial
Church History/ Tutorial
World Religion/ Tutorial
New Testament Introducion/ Tutorial
Christian Doctrine/ Tutorial
Teamwork

Es sind eigentli all Fächer spannend. Am meischte usefordere tuet mich aber Christian Doctrine. Will mer det wücki tüfi Frage allueged. Eusi Tutorin, tuet eus rächt befröge. Das wo mich am meischte zum nahdänke bringt, isch, sie het eus gseit, gad am Afang vode Stund. Das mer lerne werded, wiso das mer glaubed, was mer glaubed. Isches eifach, will euse Pastor, Eltere, Schuel ect... eus das gseit hend, idem sinn ja min Pastor het gseit... oder glaubemer wücki was mer glaubed, will mers glaubed! Ich finds guet, es isch e gueti frag und mir lerned zwüsse wiso mir glaubed was mer glaubed. Ich hoff ihr chömed drus. Ja es gaht au um die persönlich Istellig vo eim. Es isch no schwierig zum erchläre. Aber sie isch guet, rächt guet. Super Frage stellt sie und meh dänkt wücki über vieles ganz anders nah. Wie ebe, glaub ich eifach das gwüssi sache so und so sind wills mer eifach öpert gseit het... Ja ich hoff ihr chömed drus...?! Aber ich dänk es isch guet, will ich weiss ja nie wem ich mal begägne wird, vielicht öpert wo u viel Frage het und viel möcht wüsse. Wie unlässig wers den, wen ich nur chent antworte, ja das hani mal ghört und das het mir mal öpert gseit... Aber die Person möcht wüsse was ich glaub und ned was ich ghört han etc... Ja ich hoff ihr chömed drus. Es bringt eim wücki zum grüble aber uf positivi Art und Wiis!

Worldreligion, isch au sehr spannend. Da werdemer eifach verschiedeni Religione aluege. Am Zischtig, hämmer eifach paar churz chli aglueged gha, was es für Religione git. Puh und vieli hani ned mal kännt. Da freui mi au scho druf, zum gseh was andei glaubed oder wie anderi läbed. Isch au guet zum chli basic sache zwüsse. Au da, meh weiss nie, wem mer begägned und den es wüsse ha zum mit öpertem duskutiere isch sicher spannend.

Ja es isch e gueti Wuche gsi, ich weiss ich wird viel lerne. S guete isch, das ich ja das au möcht und das mich die Themene wücki intressiered und ich mega en hunger han zum meh wüsse. Es isch au ned so das mer da Notene hend. Entweder du bestahsch oder ned. Aber s Ziel isch vode Tutore, das jede chan bestah. Es isch ned so das es eifach wie ade Uni um lerne und Studiere gaht, sondern meh drum öpis chöne mitneh fürs persönliche Läbe. Sie säged, wen du chunsch, schniededs dich uf, nämed alles use und fülled dich neu. Haha das Bispiel gfallt mer. Ich han wücki scho einiges glernt, ned nur so "Theologisch" au ganz persönlich, charakterich. Es isch e challeng aber e gueti.

Trotz dere super Wuche bini froh ums Wucheänd und ich freu mi uf min freie Mäntig. Es isch so viel Hirnstoff und den alles uf Änglisch und die einte Wörter würdi ned mal in Dütsch verstah. =) Drum gits au es Studentsupport. Das isch es Team, wo für Schüeler da isch, wo schwierigkeite hend, mit verstah oder nahcho oder ebe für Schüeler, wo no mitem Änglisch müeh hend. Ich han mich hüt mit einere troffe wo i dem Team isch. Gottseidank sie isch Dütschi! ;-) Sie het mer erchlärt wie alles lauft und nächscht Wuche träffemer eus nomal, zum alles gnau aluege, woni mache und wüsse mun für die erschte Arbete!


Hüt wirdi eifach no de rescht von Tag gnüsse, nochli läse und sache vorbereite für die nächscht Wuche. Es isch so schön und warm hüt, richtig Früehlig! Hoff es blibt so! ;-)

Hoff Ihr sind und blibed au zwäg!

Wünsch eu ganz es schöns Weekend!
Bis gli

Bhüet eu Gott

Cristina