Was für e Wuche

Wow, das isch echt e intensivi Wuche gsi. Keis wunder heisseds Intensivs... Obwohl, ich nur 3 Täg Schuel gha han, isches zimli viel gsi. Min Chopf isch zimmli gfüllt. Es isch zimli asträngend, i mim Chopf tuni alles no übersetze, ich tuen zuelose und mitschriebe. Das isch viel asträngender als es tönt. Ich wart immer no druf, uf English zdänke und träume. Aber das chunt ja no. Ich bin ja erscht 3 Wuche da. Erscht 3 Wuche. Ich han sgfühl, ich bin scho e ewigkeit da. Zit lauft so schnäll und gli isch sJahr ume und mir hend scho 2011. Aber zrugg zu minre Wuche. Mäntig und Mittwuch hani frei gha. Am zischtig is mal los gange. Mir hend de ganz Tag sgliche Thema gha, über Teamwork. Was das isch, wie das funktioniert, die biblische aspäkt vo Teamwork, was chan ich allei, für wen und was bruch ich es Team, für was überhaupt. Was chan ich erreiche, etc... zwüsched dure hämmer natüri Pausene gha. Zwei mal ide Wuche hämmer chapel. Das heisst, mir hend wie en Gottesdienscht eifach nur mir mitem College. Das hämmer ebefalls am Zischtig gha und am Fritig. Eifach euse Private GD (Gottesdienscht) nur für eus, das isch speziell aber guet. I like it! Den am Donnschtig hani serschtmal mis Pathwayfach gha ( das isch ebe social Justice, Soziali gerächtigkeit, oder gsellschaftlichi gerächtigkeit) Es isch sehr viel Theorie gsi de ganz Tag und vorallem asträngend zum zuelose, amel für de Afang. Mir hend verschiedeni Statistike agluegt, über Sozialie Umfälder, über Wirtschaft, Ekononie, Globalisierig etc. Mir hend die biblische Aspäkt agluegt über Grächtigkeit und de Sozialaspäkt vode Bible (wen mer dem so chan säge) uf jedefall han ich de Teil erstuhnlicherwies viel besser verstande. Ebefalls hämmer au verschiedeni Organisatione aglegt wo sgit. Wie Unicef, Worldvision, Compassion, Charity Water, hope for Rwanda ( wo es mitglied us de Hillsong Church gründet het) Es isch eifach mega spanned zgseh, wie viel Not und Armuet dases git. Natürli gits en hufe Länder, aber au da under eus. Ide Schwitz wie au da in Australie. Klar, mir hend gnueg zässe und ztrinke, Chleider usw. Eigentli müsst niemert Obdachlos sie, will euses Sozialsystem guet isch, und euse Staat het au Gäld. Aber mir wüssed ned us welchne Gründ die Mänsche Obdachlos sind. Klar es isch underschiedlich. Aber da sind Persönllichi Nöt da wo mitem Aug vielicht ned Sichtbar sind. Mir lerned eifach sensibel zwerde uf die Nöt wo ume sind, segs etz i eusem Umfäld, wämer mitem Streetteam zu Bedürftigte Lüt hei gönd go putze oder choche, oders segs etz, bi öpisem mitzgschtallte wo e Organisation understützt. Vorallem au wie chömer de Mänsche us biblischer Sicht Hälfe. Was het Jesus gmacht, was seit Bible zu dem Thema. Was isch Ufgab vode Chile, was vom Staat, wie chamer de Staat under stütze, wie Lüt i 3 Wältländer. Es isch so spannend. All die Sache zlerne. Vorallem, gaht die ganz Wält allne öpis a. Mir läbed all i einere Wält und es chan jede öpis mache. Es isch trurig das Mänsche, Regierige, weg lueged und Nöt ignoriered wo mer chent behebe. Vielicht tönts naiv, aber es isches ned, es chent jede en chline Teil dezue Biträge, das anderi Understützt werded. Ich persöhnlich, bin entsetzt, weni i Zitschrifte oder i Dokufilm gseh i was für Umständ Mänsche münd läbe, wärend dem das ich Wasser usem Hahne chan trinke. Wärend dem das ich so viel zässe han, das es mir ned weh tuet, wen ich mal öpis furt rüehre und anderi kämpfed und bättled Tag für Tag das sie chend öpis ässe. Sgliche mit de Chleider, was für en Luxus es isch en Chleiderschrank voll Chleider zha. Nur scho 2 paar Jeans zha ischen Luxus. Ich bin im 2009 ide Philippine gsi. Det han ich so viel armuet gshe, wie nonie i mim Läbe. Familie wo ufem Trottoir schlafed, Chind wo bättled... Det isch mer wücki bewusst worde wie guet ichs doch han, aber det isch mer au bewusst worde, das ich ned eifach da chan si, mit allem woni han und paar hunderttusig Kilometer hungered Lüt. Ich han den es Pathechind gfunde, woni mit es paar Franke die ganz Familie chan understütze. Ich stahn im regelmässige Briefkontakt mit ihne. Es isch schön zgseh wie ich eifach e Familie chan understütze. Es het mich zu träne grüert, zläse für was das sie sGäld bruched. Eifachachi sache, wo für mich sälbschtverständlich sind. Gott hät mich so rich beschänkt, mit allem woni han. Ich bin gsägnet im überfluss. Aber ich glaub au das ich das woni bechum eifach chan witer geh. Ich bin so gsägnet und ich möcht de Säge eifach witer geh. Will ich au dmöglichkeite han zum das mache. Wie au immer das in Zuekunft no wird usgseh, ich möcht eifach Hälfe und da am College hani scho mal e gueti Schuelig für de Afang. Nächscht Wuche wird au nochli Theoriemässig usgseh, aber ich weiss das mer i dem Fach viel Praktisch werded mache, uf das freu ich mich riessig. Ich han vorher s Streetteam adönt. Mir hend es Team, wo verschiedeni Sache macht. Segs etz zu de Obdachlose gah, oder ebe zu Lüt hei go im Hushalt hälfe, oder mit Judendliche, ich weiss au nonig alles gnau, aber han scho viel spannends ghört und ich bin gschpannt, wo das ich iteilt wird.

De Theologisch Teil hämmer nonig gha, aber das chunt sicher no nach de Intensives. Uf das freu ich mich riesig. Eifach die ganz Bible usenand neh und sache aluege, Gschichter, was mer vom Alte is Neue Testamänt chan überneh, dJahre, wen wo was passiert. Ich liebs, ich freu mi, mich chöne idie Zit ie versetze und mir i minre Fanrasie uszmahle, wies ächt gsi isch. Ich freu mi zrechechiere (schriebt mer das so?) in griechisch und hebräisch, vielicht sogar latin? Ja das git den en sprach Salat weni sowiso alles no is dütsche muss übersetze! ;-) Ich lis etz scho sit 6 Jahr ide Bible, aso ich mein wücki läse, aber no tüfer chöne is Wort gah und verstah, imne Vers woni scho 100 mal gläse han öpis ganz neus entdecke, das isch toll.
Zum bispiel staht im 5.Mose 15,11: Es werden allezeit Arme sein im Lande; darum gebiete ich dir und sage, dass du deine Arme auftust deinem Bruder, der bedrängt und arm ist in deinem Lande. Oder en andere Jesaja 58,7: Brich dem Hungrigen dein Brot, und die im Elend ohne Obdach sind, führe ins Haus! Wenn du einen Nackt siehst, so kleide ihn, und enzieh dich nicht deinem Fleisch und Blut. Beidi Verse hani sicher scho xmal gläse, aber glaub serscht mal isch mir bewusst worde, was die Verse bedüted, was sie für mich heissed oder eus allne. Isch mir sicher au rächt bewusst worde, will ich mich au gand so mit Thema Armuet befass etc... aber eifach zgseh wie uf eimal öpis, wo mer scho paar mal gläse het, uf eimal e ganz anderi sicht i eim weckt, das isch doch u spannend!
Ja das mal zu dem! =)

De Grund warum ich am Mäntig frei han isch, will ich am Sunntig ide Gds mithilf und i eim eifach so debi bin ohni öpis mache. Mir hend am Fritig Abig speziell für teenies, am Samschtig Abig hets eifach en normale GD, am Sunntig Morge 3 und am Abig nomal 2. De grund warum mir soviel Gottesdienschte hend, isch, wills eifach en hufe Lüt het, wo ide church sind. Will ned all platz hend, hämmer soviel verteilt und es isch jedes mal volle! Mini ufgab isch, eifach Lüt begrüesse, wo neu sind. Mir hend e Welcome Lounge, wo neuiLüt eifach chend hi höckle und Kaffi trinke. Euses Team luegt eifach, das sich vorallem Bsuecher oder ebe Neui Lüt gad wohl fühled, das sie gsend das eusi Church en Ort isch, wo jede Willkomme isch. Hüt hani min erschte Tag gha. Es isch ned so eifach, vorallem so chli zum underscheide wer etz wücki neu isch, will ich ja sälber no "neu" bin! =) Aber es het spass gmacht. Ich han e Schwitzerin troffe, öpe i mim Alter wo eifach chli am reise isch. So luschtig, isch sicher au kein Zuefall das ich gad sie han dörfe kännelerne a mim erschte Hälfer Tag. Ja mir hend lang gschwätz und Nummere ustusched. So schnäll gahts! =)
Hüt Abig gahni den nomal id Church und den wird no en Geburri ide WG gfiired!

Übrigens, hani etz all Schwitzer känneglernt unsem Citycampus. Es sind nün, wen ich mich ned verzellt han. Eini chunt sogar au us Rüti, wie chli isch den dWält! ;-)

Ja so, wow, wiedermal viel ufgschriebe han! Es macht spass, de Blog füehre und ich hoff eu au de zläse.
bis gli den!

Hebed eu sorg und bhüet eu Gott!

Cristina